Me ftesë të Presidentit të Shqipërisë, Ilir Meta, Presidentja e Kosovës, Vjosa Osmani, këtë të mërkurë ka udhëtuar për në Shqipëri.
Në Shqipëri, Osmani së bashku me presidentin shqiptar do të marrë pjesë në konferencën ndërkombëtare me temë, “Trendet aktuale të trafikimit të qenieve njerëzore në Ballkanin Perëndimor”, këtë e ka bërë të ditur Zyra e Presidencës së Kosovës.
“Në këtë konferencë, Presidentja Osmani do të jetë ndër folëset kryesore, dhe në ekspozenë e saj do të flasë për trafikimin me qeniet njerëzore në kontekstin kosovar, rajonal dhe global”, njofton zyra për medie e Presidencës, transmeton Portali D.
Folës në këtë konferencë, përveç presidentit Meta dhe Presidentes Osmani, do të jenë edhe senatorë e kongresmenë amerikanë, përfaqësues të OKB-së, si dhe të organizatave joqeveritare që merren me luftën kundër trafikimit me qenie njerëzore.
Ndërkaq, në fillim të javës presidenti Meta kishte qëndruar në Kosovë me rastin e përvjetorit të 110-të të Kuvendit të Junikut.
Këtë vizitë e kishte realizuar së bashku me Presidenten e Kosovës, Osmani, me të cilën kishin vendosur lule te busti i heroit Edmond Hoxha, në Junik.