Në Ditën Ndërkombëtare të Gruas, presidentja e Kosovës, Vjosa Osmani, ka porositur të gjitha gratë dhe vajzat e vendit që të mos ndalojnë kurrë së ëndërruari dhe besuari.
Me anë të një postimi në Facebook, Osmani ka thënë se në fusha të ndryshme, gratë janë ato që kanë dëshmuar se janë të afta t’i arrijnë majat e suksesit.
Kjo sepse siç thotë presidentja “ato munden, sepse kanë potencial”.
“Të gjitha grave dhe vajzave të Republikës, sot e çdo ditë: Mos ndaloni kurrë së ëndërruari, por në veçanti, mos ndaloni kurrë së besuari”, shkroi Osmani.
“Le ta kujtojmë forcën, guximin dhe qëndrueshmërinë e jashtëzakonshme të grave dhe vajzave tona. Në arsim, sport, kulturë, biznes, shkencë ose politikë, gratë kanë dëshmuar se janë të afta t’i arrijnë majat e suksesit. Ato munden, sepse kanë potencial”, shtoi ajo.
Sipas presidentes, së bashku, mund të krijohet një botë ku gratë janë të barabarta e të lira për t’i përmbushur synimet e tyre.
“Le të zotohemi të gjithë që ta bëjmë secili pjesën tonë të punës për t’u siguruar që zëri i çdo gruaje të dëgjohet, që potenciali i çdo gruaje të vie në shprehje maksimalisht”, shtoi ajo.
Ndryshe, kryetari i Komunës së Prishtinës, Përparim Rama, me rastin e 8 Marsit, Ditës së Gruas, i ka dhuruar presidentes së vendit, Vjosa Osmani, figurën e Hyjneshës në fron, e cila është simbol i qytetit të Prishtinës.
Përmes një postimi në Facebook, Rama ka thënë se me presidenten Osmani ka diskutuar për angazhimin në fuqizimin e grave dhe rëndësinë e përfshirjes së tyre në pozita drejtuese.
“Kënaqësi e veçantë të pres sot Presidenten e Republikës së Kosovës, Vjosa Osmani. Bashkë diskutuam për angazhimin tonë në fuqizimin e grave dhe rëndësinë e përfshirjes së tyre në pozita drejtuese”, shkroi Rama.
Po ashtu, Rama ka thënë se e mirëpresin thellimin e bashkëpunimit në këtë drejtim.