Presidentja e Republikës së Kosovës, Vjosa Osmani, për Krishtlindjen Ortodokse, u ka uruar qytetarëve dashuri, paqe dhe harmoni në zemrat dhe shtëpitë e tyre.
“Të nderuar qytetarë të komunitetit ortodoksë, dua t’ju shpreh urimet e mia më të ngrohta për të gjithë ju që e kremtoni këtë festë! Dashuria, paqja dhe harmonia mbushttë zemrat dhe shtëpitë tuaja”, ka thënë Osmani, shkruan Zyra e Presidentes.
Ajo ka theksuar se Krishtlindja është në funksion të dashurisë dhe solidaritetit.
“Festat sikurse Krishtlindja, janë në funksion të dashurisë dhe solidaritetit ndërmjet njerëzve. Toleranca është vlerë tradicionale e shoqërisë sonë, ndaj jo vetëm në këtë ditë, duhet ta mbështesim njëri-tjetrit dhe në të njëjtën kohë të kemi më shumë shpresë, besim e kurajo”, ka theksuar ajo.
Osmani, urimin e saj e ka përmbyllur duke iu uruar qytetarëve shëndet, begati dhe lumturi.
“Lumturia, shëndeti e begatia qofshin gjithmonë me ju! Gëzuar Krishtlindjen Ortodokse!”, ka thënë Osmani, shkruan Zyra e Presidentes së Kosovës.
Ndryshe, këtë të shtunë të 7 janarit, është dita e Krishtlindjes për Kishat katolike lindore dhe Kishat ortodokse, të cilat ndjekin kalendarin julian.