Shumica vlerëson se VMRO-DPMNE mund të vendosë për datën e zgjedhjeve vetëm pasi të votojë ndryshimet kushtetuese.
Ministri i Jashtëm, Bujar Osmani, tha se oferta për VMRO-në mbetet e hapur, por në rast se nuk i mbështet ndryshimet, zgjedhjet do të jenë të rregullta.
“Kjo ofertë është vlerësim politik. T’i votojnë ndryshimet kushtetuese dhe neve do t’ia lëmë ata të vendosin ditën e zgjedhjeve kur të duan edhe për presidencialet edhe për parlamentaret. Nëse jo, atëherë shkojnë në zgjedhje të rregullta. A do të jenë së bashku ose si do të jenë, këto janë teknikalitete dhe vlerësime të partive politike për të gjetur konsensusin e caktuar”, ka deklaruar ministri i Jashtëm, Bujar Osmani.
VMRO-DPMNE-ja thotë se ndryshime kushtetuese nuk do të ketë, ndërsa data e zgjedhjeve do të vijë një ditë.
“Të jemi të qartë, ndryshime kushtetuese nuk do të ketë, ndërsa zgjedhje do të ketë qoftë të rregullta apo të parakohshme, ndërsa BDI-ja do të shkojë në opozitë dhe do të përgjigjet për të gjitha veprat kriminale të bëra deri tani. Këtë e ka të qartë edhe Bujar Osmani edhe BDI-ja dhe kjo nervozë e tyre vërteton këtë që po e them”, ka thënë Naum Stoillkovski, zëdhënës i VMRO-DPMNE-së.
LSDM-ja kërkon që zgjedhjet presidenciale dhe parlamentare të jenë të rregullta, ndërsa për datat mund të diskutohet në kuadër të grupeve të punës që duhet të formohen nga partitë politike.
Hristijan Mickoski ditë më parë i bëri thirrje kryeministrit, Dimitar Kovaçevski, që sipas dëshirës së tij të shkruajë në një letër të bardh kur dëshiron zgjedhje presidenciale dhe parlamentare.
Sipas tij, mbajtja e zgjedhjeve në bazë të asaj se si përfundon mandati i presidentit dhe i Qeverisë do ta çojë vendin në krizë kushtetuese.
Mickoski kërkon zgjedhje në muajin prill, në mes të Pashkëve dhe Fitër Bajramit.