Të hënën e tre tetorit, në Bullgari ka përfunduar votimi për zgjedhjet e parakohshme parlamentare.
Nga votat e numëruara deri më tash, partia e qendrës së djathtë “Qytetarët për Zhvillimin Evropian të Bullgarisë” (GERB) e liderit, Bojko Borisov, ka marrë përqindjen më të lartë të votave, e cila ka qenë në avantazh me pesë pikë me partinë “Ne vazhdojmë ndryshimin”.
GERB do të ketë më së shumti deputetë në Asamblenë e 48-të Kombëtare.
GERB është me 25,43 për qind dhe “Vazhdojmë ndryshimin” me 20,21 për qind, raporton mediumi bullgar, dnevnik.bg.
PDSH është forca e tretë politike me 13.56 për qind, ndërsa “Vazrazhdane” renditet në vendin e katërt me 10.17 për qind.
BSP vijon me 9,34 për qind dhe “Bullgaria Demokratike” fiton 7,45 për qind.
Partia e fundit që ka gjetur vend në parlament është “Ngritja Bullgare” me 4.65 për qind.
“Ka një popull të tillë” me gjasë nuk do të mund të hyjë në Asamblenë Kombëtare, pasi ka mbledhur vetëm 3.84 për qind të votave.
Ndërkaq, rezultatet përfundimtare zyrtare që do të numërojnë edhe fletëvotimet nga jashtë, priten të mërkurën e pesë tetorit.
Ndryshe, votimet në Bullgari kanë filluar më 2 tetor, zgjedhje këto të katërtat për Kuvendin në një vit e gjysmë.
Në Bullgari votimi është zhvilluar në 11 mijë e 845 seksione votimi.
Për bullgarët jashtë vendit, ka pasur 755 seksione votimi në 62 vende.