Kryetari i Listës Serbe, Goran Rakiq, përmes një video-mesazhi, ka thënë se kushtet për heqjen e barrikadave në Veri janë që të lirohen të arrestuarit dhe të tërhiqet Policia nga Veriu i Kosovës.
Barrikadat e vendosura në Veri të vendit tashmë kanë bërë njëmbëdhjetë ditë prej kur janë vendosur.
Rakiq, pretendon disa lista që sipas tij kanë të bëjnë me “vrasjen e serbëve”.
“Narrativa antiserbe e Prishtinës ka vazhduar me muaj e vite. Njerëzit tanë e ndjenë vetë se sa shumë Prishtina kujdeset për respektimin e të drejtave të tyre. Mirëpo, deklarata e fundit e Albin Kurtit ka kaluar çdo masë. Në të, Kurti haptazi sugjeron vrasjen e serbëve në barrikada, sepse sipas tij, ata nuk mund të largohen ndryshe”, ka thënë Rakiq.
Ai ka kërkuar edhe reagimin e bashkësisë ndërkombëtare.
Ndryshe, Drejtori i së ashtuquajturës Zyrë për Kosovën në Serbi, Petar Petkoviq, ka reaguar sot ndaj deklaratës së kryeministrit të Kosovës, Albin Kurit, i cili kishte thënë se “largimi i barrikadave në veri të vendit nuk mund të përjashtojë fatkeqësitë”.
Deklaratën e kryeministrit Kurti, ai e ka konsideruar si “kërcënim ndaj serbëve”.
“Kur e dimë se çfarë kishte qenë i gatshëm të bënte në të kaluarën për të provokuar një përshkallëzim të situatës në terren, ne i marrim shumë seriozisht kërcënimet e tilla”, theksoi Petkoviqi.