Partia Demokratike e Kosovës (PDK) dhe Lidhja Demokratike e Kosovës (LDK) kanë arritur marrëveshje për të hyrë së bashku në koalicion në raundin e dytë të zgjedhjeve lokale në Prizren.
Lajmi është konfirmuar nga kryetari aktual i komunës, Shaqir Totaj, i cili përmes një postimi në Facebook njoftoi se dy partitë do të garojnë së bashku në balotazhin e 9 nëntorit.
Ai ka falënderuar kryetarin e degës së LDK-së në Prizren, Driton Selmanaj, për mbështetjen, duke e cilësuar koalicionin si “rrugëtim të përbashkët +4 për Prizrenin”, një angazhim për të mirën e qytetit dhe qytetarëve të tij.
“Sot jam i lumtur ta ndaj lajmin e arritjes së koalicionit për bashkëqeverisje me LDK-në, i bindur se idetë e reja dhe përvoja e kësaj force politike do t’i shërbejnë Prizrenit edhe më shumë. E falënderoj udhëheqjen e kësaj partie dhe kryetarin e degës në Prizren, Driton Selmanaj për besimin dhe mbështetjen në balotazh duke dëshmuar se para Prizrenit dhe qytetarëve të tij, interesat partiake mbesin në rendin të dytë”, ka shkruar Totaj.
Me këtë aleancë, PDK dhe LDK do të përballen në balotazh me kandidatin e Lëvizjes Vetëvendosje (VV), Artan Abrashi.