Deputetja e Partisë Demokratike të Kosovës (PDK), Eliza Hoxha dhe asambleisti Leutrim Retkoceri, në një konferencë për media, kanë njoftuar se dega e Partisë Demokratike në Prishtinë kërkon që “plani i ‘Kalabrisë’” të revidohet, përndryshe, sipas saj, nuk do të përkrahet nga PDK.
Sipas Retkocerit, në Badoc kryetari i Prishtinës, Përparim Rama, është munduar ta tjetërsojë pronën publike për t’i akomoduar kërkesat e disa kompanive të ndërtimit të afërta me të.
“Ndërkaq, në planin e propozuar të Përparim Ramës për lagjen ‘Kalabria’, prapë mbi 15 hektarë të pronës publike, po vihen në shërbim të disa kompanive të ndërtimit. Në të dyja rastet, në Badoc dje dhe në ‘Kalabri’ sot, Përparim Rama po tregon që është shndërruar në një zyre projektuese që nuk e sheh pronën publike si hapësirë për qytetarët, por veç si tokë për ndërtim”, ka thënë Retkoceri.
Ndërkohë, deputetja Eliza Hoxha ka njoftuar se PDK-ja nuk ka votë për planin e “Kalabrisë”. Sipas saj, plani aktual që e ka propozuar kreu i kryeqytetit nuk përmban elementet e duhura ligjore, praktike dhe urbanistike.
Hoxha ka ftuar të gjithë publikun, përfshirë arkitektët, që të shikojnë planin dhe të bëhen aktiv në mbrojtjen e interesit publik.
“A nuk duhet të na vije keq që ende i referohemi lagjeve ‘Ulpiana’, ‘Bregu i Diellit’ e ‘Dardania’ si lagjet më të mira e më cilësore për të jetuar? A nuk na vije keq që për 40 vite nuk kemi arritur të prodhojmë një plan e një lagje të re në qytet që do të ishte shembull i mirë dhe model për t’u ndjekur?” , ka thënë deputetja.