Partia Demokratike e Kosovës (PDK) ka propozuar 9 qershorin si datë për zgjedhje të parakohshme.
Në seancën e së enjtes në Kuvendin e Kosovës ku u diskutua për tenderët njëburimorë janë përmendur edhe zgjedhjet.
Shefi i Grupit Parlamentar të PDK-së, Abelard Tahiri, ka thënë se tashmë e kanë datën e zgjedhjeve, por, sipas tij, pushteti po i frikësohet kësaj.
Sipas Tahirit, pozita ka vetëm lojë fjalësh dhe nuk guxon ta shpërndajë kuvendin me këtë datë.
“PDK tashmë e ka propozuar një datë për zgjedhje dhe ajo është 9 qershor, por marrë parasysh josinqeritetin e këtyre dhe frikën për të shkuar, ne e dimë që ajo ka qenë vetëm një lojë fjalësh sepse këta nuk guxojnë ta shpërndajnë kuvendin më 9 qershor. Nuk mundet me kaq lehtësi dhe me këtë sportivitet kaq të madh me anashkalu votimin e një komisioni hetimor”, ka thënë Tahiri.