Kryetari i Komunës së Mitrovicës, Faton Peci, ka treguar se në Prokurorinë Speciale është përgjigjur në lidhje me një kallëzim penal të ngritur nga LDK-ja përmes ish-deputeti Paris Guri e që ka të bëjë me procesin e granteve të Ministrisë së Bujqësisë, pra në kohën sa ai ushtronte këtë pozitë.
Për këtë ai thotë se së shpejti do t’iu dorëzohet organeve të drejtësisë me një kallëzim penale kundër siç thotë kallëzimit të rrejshëm.
“Permes këtij postimi, ju informoj se sot isha në Prokurori për të dhënë përgjigjet dhe sqarimet e mia në kallëzimin penal të ngritur nga LDK-ja përmes ish-deputetit të saj të zgjedhur nga votat e vjedhura të mërgatës, Paris Guri.
Në prokurori, sikur gjithmonë gjatë jetës sime, isha transparent, i qartë dhe i drejtpërdrejtë në lidhje me shpjegimet rreth çështjes dhe rolit që kam pasur si Ministër në procesin e granteve të Ministrisë së Bujqësisë, Pylltarisë dhe Zhvillimit Rural.
Shumë shpejt, do t’iu drejtohem organeve të drejtësisë me një kallëzim penal kundër kallximit të rrejshëm penal ndaj ish deputetit me vota të vjedhura të mërgatës.
Sepse ai permes orkestrimit udhëhoqi një fushate, shpifjesh e insinuatash të paqena, që çuan deri te një kallëzim i rrejshëm penal kundër meje si minister.
Për fund, dua të përsëris dhe t’ju siguroj se sulmet, akuzat e pabaza, gënjeshtrat, shpifjet, kërcënimet e përpjekja për baltosjen e emrit tim, nuk më ndalin nga punët e mira e punët e mëdha për Kosovën!
Vazhdojmë”, ka shkruar Peci.