Aleanca për Shqiptarët në Maqedoni të Veriut, e ka quajtur “sulm skandaloz” ndaj shtetit të Kosovës ndalimin e presidentes Vjosa Osmanit në aeroportin e Shkupit, ku sigurimi ka tentuar që t’ia marrë telefonin personal.
“Sulm skandaloz ndaj Kosovës, të mbahet përgjegjësi dhe të kërkojë falje Qeveria Aleanca për Shqiptarët dënon ashpër provokimin e rëndë ndaj Republikës së Kosovës, përmes sjelljes skandaloze të zyrtarëve të Aeroportit të Shkupit ndaj Presidentes së Republikës, Vjosa Osmani”, thuhet në reagim, transmeton Klan Maqedoni.
Në reagimin e tyre, bëhet thirrje urgjente që autoritetet kompetente “të hetojnë dhe të sanksinojnë të gjithë personat përgjegjës për këtë sulm skandaloz ndaj autoritetit të Presidentes së Kosovës, duke shkelur të gjitha protokollet dhe konventat ndërkombëtare”.
Në reagim, gjithashtu, thuhet se Qeveria e VMRO-së përmes “vasalëve të VLEN”, duke mos u mjaftuar me degradimin që u kanë bërë shqiptarëve në RMV, tani tentojnë që të nënçmojnë dhe ofendojnë edhe Kosovën.
“Për ne ky rast nuk është një incident i thjeshtë, por një provokim i rëndë për të cilin duhet të mbajnë përgjegjësi dhe të kërkojnë falje nga i pari i Qeverisë, deri tek personat që kanë qenë pjesëmarrës në këtë rast”, përfundon reagimi i tyre.