Në Gjykatën Themelore në Prishtinë është mbajtur seanca gjyqësore ndaj të akuzuarve për rastin Banjska, ku gjatë kësaj seance ishte paraparë dëgjimi i dëshmitarëve kyç në këtë proces gjyqësor.
Sipas raportimit të gazetares së Dukagjinit, Dorentina Thaçi, nga salla e gjyqit, trupi gjykues ka aprovuar kërkesën e prokurorit special që dëshmia e Dragana Antonijeviq të lexohet në gjykatë. Vendimi është marrë për shkak se e njëjta, ndonëse është ftuar disa herë për të dëshmuar, nuk është paraqitur në gjykatë, me arsyetimin se ndodhet në Serbi dhe nuk ka qenë e mundur sigurimi i pranisë së saj fizike.
Po ashtu, kryetari i trupit gjykues ka lënë pezull dëshminë e një personi tjetër, i cili ndodhet në Maqedoninë e Veriut. Sipas njoftimit të gjykatës, autoritetet gjyqësore në Shkup kanë bërë të ditur se janë duke shqyrtuar mundësitë ligjore dhe teknike për realizimin e kësaj dëshmie nga atje.
Ndërkohë, pas këtyre vendimeve, seanca gjyqësore për rastin Banjska ka përfunduar, pasi trupi gjykues ka aprovuar edhe kërkesën e mbrojtjes për dëgjimin e një dëshmitari në vazhdim të procesit gjyqësor.
Seanca e radhës pritet të caktohet në ditët në vijim.