Oda Përmbaruesve të Kosovës, ka thënë se, do të ballafaqohet në gjykatë më Ministrinë e Drejtësisë, për Udhëzimin Administrativ i cili ulë tarifat e përmbaruesve deri në 40%.
Oda, ka thënë se do t’i shfrytëzojë të gjitha mjetet e nevojshme derisa të shfuqizohet Udhëzimi Administrativ, siç është publikuar dje nga Ministria e Drejtësisë, ashtu që të rikthehet pavarësia e profesionit, ”të ri-sigurohet integriteti i përmbaruesit, dhe të shmangen keqkuptimet ose keqpërdorimet e profesionit për fushata politike”.
“Oda e Përmbaruesve nuk i pranon shantazhet politike, ndërhyrjet në pavarësinë e sistemit gjyqësor, dhe shfrytëzimin e përmbarimit për interesa politike të Ministrisë së Drejtësisë ose ndonjë klani të caktuar”, ka shkruar në Facebook.
Më tej në reagim thuhet se Oda është shumë e shqetësuar për zhvillimet e djeshme lidhur me profesionin e përmbarimit.
Ky reagimi erdhi si pasoje e nënshkrimit të Udhëzimit Administrativ nga ministrja e Drejtësisë, Albulena Haxhiu, ku sipas tij tarifat e përmbaruesve zbriten deri në 40 për qind.