Familjarët e policëve të rënë në detyrë në Kosovë kanë shprehur shqetësimin e tyre për mos-ekzekutimin e pagesave për muajin dhjetor.
Një familjar i një polici të rënë ka konfirmuar për TV Dukagjini se kjo nuk është hera e parë që ndodh.
“Po, e njëjta ka ndodhur edhe në gusht ose korrik, dhe tash në dhjetor e njëjta situatë”.
Sindikata e Policisë së Kosovës ka reaguar zyrtarisht, duke kërkuar nga institucionet përgjegjëse, veçanërisht Ministria e Financave, që të ekzekutojnë menjëherë mjetet financiare të mbetura, në vlerë prej 290,000 euro, të parashikuara për familjet e policëve të rënë gjatë kryerjes së detyrës.
“Sindikata e Policisë së Kosovës shpreh shqetësimin e saj të thellë lidhur me mos-pagesën e familjeve të policëve të rënë gjatë kryerjes së detyrës për muajin dhjetor. Edhe pse nga Drejtoria e Financave është bërë kërkesa zyrtare për ndarjen e mjeteve financiare në vlerë prej 290,000 euro, deri më tani këto mjete nuk janë ekzekutuar nga Ministria e Financave. Si pasojë, familjet e policëve të rënë në detyrë, të cilët janë një kategori e shenjtë dhe e respektuar për vendin tonë, kanë mbetur pa pagesë edhe pas përmbylljes së vitit. Kjo situatë është e papranueshme dhe e dhimbshme, duke marrë parasysh sakrificën sublime të këtyre familjeve, të cilat kanë dhënë bijtë dhe bijat e tyre për sigurinë e vendit tonë, ruajtjen e rendit publik dhe mbrojtjen e qytetarëve të Republikës së Kosovës. Sindikata e Policisë së Kosovës u bën thirrje institucioneve përgjegjëse, në veçanti Ministrisë së Financave, që sa më parë të gjejnë zgjidhje dhe të realizojnë pagesat e mbetura, në mënyrë që të mos cenohet dinjiteti dhe mirëqenia e këtyre familjeve”, thuhet në reagimin e Sindikatës