Policia e Kosovës ka raportuar për pesë raste të dhunës në familje brenda 24 orëve të fundit, të regjistruara në qytete të ndryshme të vendit.
Në Prishtinë, më 7 shtator rreth orës 12:30, një grua kosovare është sulmuar fizikisht nga i dyshuari mashkull. Viktima ka marrë trajtim mjekësor, ndërsa i dyshuari është arrestuar dhe me vendim të prokurorit është dërguar në mbajtje.
Në Podujevë, Policia ka arrestuar më 7 shtator një të dyshuar që akuzohet se më 27 gusht kishte ushtruar dhunë ndaj dy grave kosovare. Pas intervistimit, me urdhër të prokurorit, i dyshuari është dërguar në mbajtje.
Në Fushë Kosovë, janë regjistruar dy raste më 7 shtator.
Në orën 15:20, një burrë është arrestuar pasi kishte ushtruar dhunë psikike dhe fizike ndaj një gruaje kosovare. Pas konsultimit me prokurorin, i dyshuari është liruar në procedurë të rregullt. Po atë ditë, rreth orës 19:00, një tjetër burrë u arrestua pasi kishte sulmuar fizikisht bashkëshorten e tij pas një mosmarrëveshjeje. Me vendim të prokurorit, i dyshuari është dërguar në mbajtje.
Në Kaçanik, më 7 shtator rreth orës 12:00, një grua raportoi se ishte dhunuar fizikisht nga bashkëshorti, duke pësuar lëndime trupore. Ajo mori tretman mjekësor në QKMF-Ferizaj, ndërsa i dyshuari u lirua në procedurë të rregullt pas intervistimit.
Ndërkohë, në Prizren, më 7 shtator në orën 21:30, një grua denoncoi dhunë psikike dhe fizike nga bashkëshorti i saj.
Pas intervistimit të palëve, me urdhër të prokurorit, rasti është iniciuar dhe do të procedohet në procedurë të rregullt.