Detaje të reja po dalin për një kornizë të mundshme armëpushimi që thuhet se i është paraqitur si SHBA-së ashtu edhe Iranit. Megjithatë, kjo nuk është hera e parë që propozohet një plan për t’i dhënë fund konfliktit.
Përpjekjet e mëparshme për negociata kanë dështuar, pasi palët ose kanë refuzuar kushtet, ose kanë mohuar se bisedimet kanë ndodhur fare.
Më 24 mars, u raportua se një plan me 15 pika ishte dërguar në Teheran nga SHBA-ja, me Pakistanin si ndërmjetës.
Sipas mediave izraelite, plani përfshinte kërkesa që Irani të shkatërrojë objektet kyçe bërthamore, të ndalojë financimin e grupeve të armatosura në rajon – si Hezbollahu dhe Houthit – si dhe të rihapë Ngushticën e Hormuzit. Në këmbim, SHBA-ja do të hiqte sanksionet ndaj Iranit.
Teherani e refuzoi fillimisht planin, duke e cilësuar si “të tepruar”. Më vonë, mediat shtetërore iraniane publikuan pesë kushte për përfundimin e luftës, që përfshinin kompensime për dëmet dhe garanci që Irani të mos sulmohej më.
Më 31 mars, u raportua për një tjetër plan paqeje me pesë pika, i hartuar nga Pakistani dhe Kina, pas vizitës së ministrit të Jashtëm pakistanez në Pekin për të siguruar mbështetje.
Ky zhvillim përkoi me deklaratat e presidentit amerikan Donald Trump se negociatat po shkonin “shumë mirë”, ndërsa Irani këmbëngulte se nuk kishte bisedime, raporton BBC.
Më 2 prill, Trump pretendoi se Irani kishte kërkuar armëpushim, por kjo u hodh poshtë menjëherë nga Ministria e Jashtme iraniane si “e pavërtetë dhe e pabazë”.