Policia e Kosovës bëri të ditur se dy shoferë të moshës 20-vjeçare me vendbanim në Francë janë ndaluar dhe janë gjobitur, pasi po bënin gara shpejtësie me vetura në Ferizaj sot në orët e para të mëngjesit.
Policia ka thënë se M.H. dhe G.S. po vozisnin me shpejtësi 144 kilometra në orë në zonën ku shpejtësia e lejuar është 40 kilometra në orë.
“Ndaj tyre policia u shqiptoi nga një gjobë për kundërvajtje sipas ligjit të komunikacionit rrugor, me dënim 1000 euro, gjobë e cila me pëlqimin e palëve u shqiptua edhe për masën mbrojtëse dhe pikët negative, për shtetasit e huaj. Me këtë rast Policia Rajonale në Ferizaj apelon tek shoferët e automjeteve që të respektojnë shenjat dhe rregullat e komunikacionit. Veprimet e tilla rrezikojnë direkt jetën e tyre dhe pjesëmarrësve tjerë në komunikacion dhe fton qytetarët të bashkëpunojnë me policinë”, thuhet në njoftim të policisë.