Njohësi i çështjeve politike Muhamet Bytyçi ka komentuar në emisionin FIVE në RTV Dukagjini çështjen e zgjedhjeve, duke kritikuar Komisioni Qendror i Zgjedhjeve.
Ai ka deklaruar se KQZ-ja prej disa vitesh e ka humbur rolin e saj kushtetues.
“Ka disa vite që KQZ-ja ka humbur rolin e saj kushtetues, është shndërruar në një arenë debatesh politike apo në prodhim të skemave populiste dhe jo në një institucion që do ta administronte procesin zgjedhor duke u bazuar në Kushtetutë dhe ligje”, ka thënë Bytyçi.
Sipas tij, sot KQZ-ja është shndërruar në instrument të pushtetit në një pjesë të konsiderueshme të veprimeve të saj.
“Sot kemi një situatë ku KQZ-ja është bërë instrument i pushtetit në shumë pjesë të saj dhe jo vetëm te rasti me Lista Serbe apo loja me Listën Serbe, sepse kjo është vetëm një lojë politike dhe asgjë përmbajtësore”, është shprehur ai.
Bytyçi ka shtuar se edhe proceset që lidhen me moscertifikimin dhe mandatimin e deputetëve janë pjesë e së njëjtës qasje politike.
“Kjo betejë me moscertifikimin, pastaj me procesin e mandatimit të deputetëve, është vetëm një lojë politike, mendoj antiinstitucionale, që KQZ-në po e vendos në një pozicion që nuk i takon realisht”, ka thënë ai.