Policia e Kosovës ka bërë të ditur se për shkak të një kanosjeje me mjete shpërthyese të mërkurën e 28 dhjetorit, është mbyllur përkohësisht Aeroporti Ndërkombëtar i Prishtinës “Adem Jashari”.
“Policia e Kosovës, sot në orët e paradites ka pranuar një informacion me përmbajtje kërcënuese, për mjete shpërthyese në aeroportin ndërkombëtar “Adem Jashari” në Prishtinë”, thuhet në njoftim.
Tutje thuhet se bazuar në këtë informacion, Policia e Kosovës në bashkëpunim dhe koordinim me institucionet relevante, ka ndërmarrë veprimet e menjëhershme policore, ku për shkaqe sigurie ka mbyllur përkohësisht aeroportin.
“Me qëllim të hetimit, kontrollit dhe masave të sigurisë, janë angazhuar njësitet relevante, andaj kërkojmë mirëkuptimin e të gjithë qytetarëve. Policia e Kosovës do të vazhdoj të ju mbaj të informuar lidhur me zhvillimet e mëtejme deri në hapjen e aeroportit për qarkullim”.
Ndryshe, të mërkurën e 28 dhjetorit, në orët e paradites, është paralajmëruar për kërcënim me bombë në Aeroportin Ndërkombëtar të Prishtinës “Adem Jashari”.
Kështu ka bërë të ditur zëdhënësja e Aeroportit, Valentina Gara, përmes një postimi në llogarinë e saj në Facebook.
Ajo ka njoftuar se të gjithë pasagjerët dhe personeli janë evakuuar nga hapësirat e aeroportit.
“Konfirmojmë se kemi pranuar një kërcënim me bombë. Udhëtarët dhe personeli janë evakuar dhe janë të sigurt. Ekipet e involvuara në planin emergjent janë duke kryer detyrat e tyre”, ka shkruar ajo.
Kërcënim me bombë në Aeroportin e Prishtinës, evakuohen pasagjerët dhe personeli