Policia e Kosovës ka konfirmuar se në mëngjesin e hershëm të së enjtes në lokacionin e quajtur “Shkëmbi i Dudës” në Mitrovicën e Veriut janë djegur kamionë të cilët kanë qenë të vendosur në barrikadë.
Tutje thuhet se përveç dëmeve materiale nuk raportohet për lëndime, përderisa rasti është duke u hetuar.
“Bazuar në informacionet zyrtare, në mëngjesin e hershëm është raportuar se në lokacionin e quajtur “Shkëmbi i Dudës” në Mitrovicën e Veriut janë djegur dy mjete të rënda (kamionë), të cilët kanë qenë të vendosur në barrikadë. Përveç dëmeve materiale nuk raportohet për lëndime, përderisa rasti është duke u hetuar”, thuhet në njoftim.
Ndryshe, ekipi i gazetarëve të RTV Dukagjini më herët kanë raportuar nga vendi i ngjarjes se janë djegur kamionët në barrikadën e vendosur te “Shkëmbi i Dudës” që pamundëson lëvizjen nga Mitrovica e Jugut në drejtim të Rudarit, Komuna e Zveçanit e vendosur nga serbët lokalë më 27 dhjetor.
Në vendin e ngjarjes pas rastit ishin prezente edhe dy patrulla të EULEX-it.