Policia e Kosovës ka dhënë detaje në lidhje me rastin në tregun e kafshëve në Prizren.
Në njoftimin e policisë thuhet se janë dy të dyshuar dhe jo tre siç është raportuar deri më tani.
Sipas policisë, njëri është i ndaluar dhe tjetri në kërkim. Personi i ndaluar është R.M., i lindur në vitin 1982, nga Gjilani.
Ai është shoqëruar në polici, ku gjendet nën masën e ndalimit prej 48 orëve, ndërsa operacioni policor është duke vazhduar në kërkim të personit të dytë të dyshuar, ku janë realizuar bastisje në shtëpinë e tij.
“Gjatë zhvillimit të operacionit për gjetjen dhe ndalimin e tyre ju njoftojmë se policia e Kosovës gjatë operacionit policor për këtë, përveç në vendin e ngjarjes ka kryer kontrolle edhe ne komunën e Gjilanit, ku është lokalizuar i dyshuari R.M, i lindur ne vitin 1982, i cili është shoqëruar ne polici për procedura te mëtejme hetimore dhe, me vendim te prokurorit të Shtetit ndalohet ne afat prej 48-ore, ndërsa operacioni policor është duke vazhduar në kërkim të personit të dytë të dyshuari, ku janë realizuar bastisje ne shtëpinë e tij. Policia rajonale ne Prizren së bashku me prokurorinë e Shtetit është duke punuar që të sqarohet në tërësi rasti i ndodhur te tregu i kafshëve në Prizren, ndërsa për të gjitha të gjeturat do të ju mbaj të informuar”, thuhet në njoftim.
Policia ka thënë se gjithçka ka ndodhur pas një mosmarrëveshjeje të çastit në mes të tregtarëve të kafshëve. Fillimisht, viktimat dhe të dyshuarit janë rrahur mes vete dhe më pas të dyshuarit kanë hedhur mjetin shpërthyes, i cili u raportua se ishte granatë dore, por policia ka thënë se është “lloj i panjohur”.
10 persona kanë pësuar lëndime, ku pesë prej tyre u dërguan në QKUK, ndërsa pesë të tjerë u liruan për në shtëpi nga Spitali i Prizrenit.
Tutje, thuhet se aktualisht, dy prej të lënduarve po marrin trajtim në QKUK.