Policia e Kosovës ka dhënë detaje rreth incidentit me armë që ndodhi mbrëmjen e së enjtes në Prishtinë.
Sipas raportit 24-orësh të policisë, një i dyshuar, i cili aktualisht është në kërkim, ka shtënë me armë zjarri AK-47 pas një mosmarrëveshjeje me disa persona.
Rasti po hetohet në drejtim të disa veprave penale, përfshirë “vrasje në tentativë”, “shkaktim i rrezikut të përgjithshëm” dhe “posedim i narkotikëve”.
Sipas Policisë, një qytetar raportoi se i dyshuari, pas një mosmarrëveshjeje, kishte marrë armën AK-47 dhe kishte shtënë me armë pasi kishte dalë nga shtëpia.
“Një mashkull kosovar ka raportuar se i dyshuari mashkull kosovar pas një mosmarrëveshjeje me disa persona, e ka marrë armën AK 47 dhe pasi ka dalë nga shtëpia kishte shtënë me armë”, thuhet në raportin e Policisë.
Gjatë kontrollit në shtëpinë e të dyshuarit, policia kanë gjetur fishekë, një jelek ushtarak dhe substanca narkotike.
“Njësitet policore në vendin e ngjarjes kanë gjetur dhe sekuestruar 19 gëzhoja, si dhe gjatë kontrollit të shtëpisë së personit të dyshuar janë gjetur disa fishekë, jelekë ushtarak dhe substanca narkotike. Në vendin e ngjarjes përveç njësive relevante policore ka dalë edhe prokurori. Personi i dyshuar gjendet në kërkim policor”, thuhet në raportin e Policisë.