Prokuroria Themelore në Prishtinë, në bashkëpunim me Policinë e Kosovës, ka konfiskuar mbi 76 kilogramë marihuanë dhe ka arrestuar tre persona të dyshuar, në kuadër të rastit të koduar “Bregdeti”.
Sipas njoftimit, më 21 janar 2026, rreth orës 23:00, afër pikëkalimit kufitar në Merdare, është ndaluar H.S., i cili drejtonte një kamion me targa vendore. Gjatë kontrollit në kamion u gjetën 68 paketime me substancë të dyshuar narkotike të llojit marihuanë, me peshë totale 76 kilogramë e 800 gramë.
Më tej, gjatë kontrollit të shtëpisë së të dyshuarit në asistencë të njësisë NJRSH, janë konfiskuar 1 armë zjarri me 5 fishekë kalibër 9 mm, 2 automjete dhe 1 kamion, 1 telefon celular, 2,950 euro para të gatshme.
Në vijim të hetimeve, më 22 janar janë bastisur edhe dy shtëpi të dy të dyshuarve meshkuj nga fshati Godishnjak – Podujevë, ku u gjetën 4 paketime marihuanë me peshë 4 kilogramë e 454 gramë, 2 automjete dhe 2 telefona celularë, thasë najloni për paketim narkotikësh, 1 armë zjarri me gaz, model Signasauser.
Të tre të dyshuarit janë ndaluar me aktvendim të prokurorit për 48 orë, ndërsa hetimet vazhdojnë dhe prokurori do të ndërmarrë të gjitha veprimet e mëtejshme ligjore.