Të dielën e dy tetorit, Policia kufitare e Kosovës ka konfiskuar mbi tre kilogramë substancë narkotike të llojit marihuanë.
Kështu është bërë e ditur përmes një njoftimi nga Policia e Kosovës, ku thuhet se në pikëkalimin kufitar “Qafë të Prushit” në hyrje nga Shqipëria për në Kosovë është ndaluar automjeti i tipit “VW Passat” me targa lokale, të cilin e drejtonte shtetasi kosovar A. F, i cili ishte i shoqëruar nga dy pasagjerë, që të tre nga Gjakova.
Pas kontrollit të automjetit në vijën e parë, sipas njoftimit të policisë, duke u bazuar në analizën e riskut, nga zyrtari profilizues është udhëzuar të dërgohet automjeti për kontroll më të detajuar në vijën e dytë.
“Gjatë kontrollimit të detajuar në bashkëpunim me zyrtarët doganorë, në bagazhin e automjetit, saktësisht te vendi i gomës rezervë është gjetur një thes i bardhë, brenda të cilit ishte e mbështjellë një qese/thes i zi, që dyshohet të jetë i mbushur me substancë narkotike-Marihuanë me sasi të përgjithshme: 3.452 gramë”, thuhet në njoftim.
Pas kompletimit të rastit në konsultim me prokurorin kujdestar, rasti së bashku me personat e dyshuar i është dorëzuar njësisë së antidrogës në Gjakovë për procedurë të mëtutjeshme.