Lëvizja e disa orendive brenda objektit të Instituteve paraklinike të QKUK-së ekspozoi disa mjete aspak të zakonshme.
Punonjësit rreth orës 14:00 hasën në mjete që dyshohet se janë shpërthyese dhe menjëherë njoftuan Policinë.
“Menjëherë pas marrjes së informatës, policia ka dalë në vendin e ngjarjes dhe ka ndërmarrë të gjitha veprimet e nevojshme për të siguruar nga rreziku i shpërthimit eventual, duke evakuar personelin përreth dhe siguruar perimetrin e nevojshëm”, tha Policia e Kosovës.
Pas këtyre veprimeve, në vendin e ngjarjes dolën edhe njësitë e specializuara të Policisë për trajtimin e mjeteve eksplozive.
Aksioni përfundoi pas dy orësh, kur Policia pastroi terrenin dhe tërhoqi mjetet e dyshimta, që sipas këtij institucioni nuk përbëjnë rrezik pasi janë materiale shkollore.
Ato, sipas Shërbimit Spitalor Klinik Universitar, dyshohet të kenë qenë aty nga koha e paraluftës dhe janë gjetur gjatë lëvizjes së pajisjeve dhe orendive nga Oda e Mjekëve, e cila funksionon në këtë objekt.
Dukagjini ka provuar të flasë me kryetarin e kësaj Ode, Pleurat Sejdiu, por ai ka qenë i pa qasshëm.