Policia e Kosovës ka njoftuar se rruga kryesore në Graçanicë nuk do të jetë e qarkullueshme për trafik deri në fund të protestës së paralajmëruar nga serbët lokalë, të cilët po e kundërshtojnë arrestimin e serbit i cili dyshohet për krime lufte në Kosovë.
Rruga do të bllokohet duke filluar nga ora 11:30, teksa bëhet e ditur se policia do ta ridrejtojë trafikun “për automjetet që qarkullojnë nga Prishtina në Gjilan dhe anasjelltas”.
“Policia e Kosovës, me qëllim të mbarëvajtjes së protestës së paralajmëruar, që do të mbahet sot në Graqanicë, duke filluar nga ora 11:30 e deri në përfundim të protestës, do të ridrejtoj trafikun për automjetet që qarkullojnë nga Prishtina në Gjilan dhe anasjelltas, pasi që rruga kryesore në Graqanicë nuk do të jetë e qarkullueshme për trafik deri në përfundim të protestës”, thuhet në njoftim.
Policia e Kosovës ka kërkuar mirëkuptim nga të “gjithë pjesëmarrësit në trafik që përgjatë kohës sa do të zgjatë protesta të shfrytëzojnë rrugët alternative”.