Policia e Kosovës ka bërë të ditur se dy persona janë intervistuar dhe pastaj janë liruar në procedurë të rregulltë lidhur me rastin në Ministrinë e Bujqësisë.
Policia e Kosovës në raportin e saj ditor ka njoftuar se janë sekuestruar pajisje elektronike si kompjuterë, telefona si dhe dokumente të ndryshme në lidhje me rastin. Pk-A bëri të ditur se dje janë ryer kontrolle në Ministrinë e Bujqësisë, Pylltarisë dhe Zhvillimit Rural, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë.
“NN. Më 27.05.2025, bazuar në urdhëresën e Gjykatës Themelore të Prishtinës nga Njësia e Veçantë e Hetimeve, janë kryer kontrolle në Ministrinë e Bujqësisë, Pylltarisë dhe Zhvillimit Rural, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë. Gjatë kontrollit janë sekuestruar pajisje elektronike (kompjuterë, telefona), si dhe dokumente të ndryshme në përputhje me urdhëresën e Gjykatës. Dy persona meshkuj kosovarë janë intervistuar dhe pas intervistimit në prani të avokatëve me vendim të prokurorit, janë liruar në procedurë të rregullt”., thuhet ne raportin ditor.
Ndryshe, Ministri në detyrë i Bujqësisë dhe njëherësh deputet i Kuvendit të Kosovës, Faton Peci, është liruar në procedurë të rregullt pas një intervistimi pesëorësh nga Njësia e Veçantë e Hetimeve në Policinë e Kosovës, në lidhje me kontratën e dyshimtë 60-milionëshe për menaxhimin e mbetjeve të nënprodukteve shtazore.
Lajmin për lirimin e tij e ka konfirmuar zëdhënësja e Prokurorisë Speciale, Arbnora Luta.
“Është liruar ne procedure te rregullt, është intervistuar ne cilësinë e te dyshuarit dhe intervistimi tashme ka përfunduar”, ka njoftuar Luta për Dukagjinin.
Për të njëjtin rast është intervistuar edhe Drejtori i Agjencisë së Ushqimit dhe Veterinarisë (AUV), Bekim Hoxha, nga e njëjta njësi hetimore e Policisë së Kosovës. Hetimet lidhen me dyshimet për keqpërdorime në tenderin për funksionalizimin e objekteve për përpunimin e nënprodukteve shtazore.
Gjatë ditës janë kryer bastisje në disa lokacione të rëndësishme, përfshirë Ministrinë e Bujqësisë, Agjencinë e Ushqimit dhe Veterinarisë, Agjencinë për Zhvillim Bujqësor dhe në lokacionin e kompanisë përfituese të kontratës.