Këshilltarja e kryeministrit të Kosovës Albin Kurti për Luginën e Preshevës, Ardita Sinani, ka njoftuar se bashkë me anëtarët e tjerë të delegacionit të Preshevës, që nga e hëna e 12 qershorit, do të zhvillojnë takime me përfaqësues të Këshillit të Evropës dhe të Parlamentit Evropian.
Me anë të një postimi në Facebook, Sinani ka thënë se pozita e vështirë e pakicës shqiptare në Serbi dhe diskriminimi konsistent do të jenë thelbi dhe tema kryesore e këtyre takimeve jashtëzakonisht të rëndësishme.
“Pas ngritjes së problematikës së shqiptarëve të Luginës së Preshevës në Kongresin e Senatin Amerikan dhe në Organizatën e Kombeve të Bashkuara, adresa jonë e radhës do të jetë Parlamenti Evropian. Nga nesër, së bashku me anëtarët tjerë të delegacionit nga Lugina e Preshevës, do të jem në vizitë 3 ditore në Bruksel për të ngritur problematikën e shqiptarëve të Preshevës, Medvegjës e Bujanocit në Parlamentin Evropian dhe Këshillin e Evropës”, shkroi ajo.
Për tri ditë në Bruksel ky delegacion do të zhvillojë 12 takime me udhëheqësit më të lartë të Këshillit të Evropës dhe Parlamentit Evropian.
“Kushtëzimi i rrugëtimit të Serbisë në integrimet evropiane do të duhej të kushtëzohej me realizimin dhe plotësimin e të drejtave të shqiptarëve në Serbi në përgjithësi, e në veçanti në komunat Preshevë, Medvegjë e Bujanoc”.
Siç theksoi Sinani, zgjidhja më afatgjate dhe më e duhura do të ishte implementimi i reciprocitetit në të drejta të serbëve që jetojnë në Kosovë dhe të shqiptarëve në Serbi.