Anëtari i Lëvizjes Vetëvendosje (LVV), Sami Kurteshi, ka ngritur akuza serioze ndaj institucioneve dhe individëve në lidhje me rastin e Astrit Deharit, duke pretenduar se arrestimet dhe hetimet e vitit 2016 ishin një inskenim politik.
Sipas Kurteshit, arrestimi i Astrit Deharit dhe pesë aktivistëve të LVV-së në gusht të vitit 2016, pak ditë përpara protestës kundër demarkacionit, ishte një inskenim i organizuar me qëllim për të fshehur autorët e vërtetë (të sulmit në Kuvendin e Kosovës) dhe për të penguar opozitën.
“Më 4 gusht 2016, ndodh sulmi me predhë në ndërtesën e Kuvendit. Ky ishte inskenimi i sulmit të armatosur mbi ndërtesën e Kuvendit te Kosovës, duke fshehur autorët e vërtetë dhe fajësimi i VV-së me qëllime te caktuara politike. Prej datës 5 gusht 2016 deri me 25 gusht, sipas policisë se Kosovës janë hetuar 4 persona krejtësisht të tjerë. Më 29 gusht 2016 arrestohet Astrit Dehari bashke me 5 aktivistë tjerë të VV-së për këtë sulm.
Kjo ishte vetëm dy ditë përpara se të mbahej protesta kundër demarkacionit në vitin 2016. Në këtë përpjektë policia ka bërë përpjekje siç thonë në gjuhën e popullit me një guri me i vra jo dy por tre zogj. Më urdhër politik nga lartë, në këtë inskenim në përgjithësi kundër LVV-së kanë qenë të përfshirë AKI-ja, Policia, Prokuroria, Gjyqësori dhe disa media në Kosovë të cilat do ti përmendim me emër”, ka thënë Kurteshi.
Ai ka akuzuar se ky rast ishte një përpjekje për të goditur LVV-në dhe ka përmendur se urdhrat për këtë veprim ishin dhënë nga ish-presidenti Hashim Thaçi dhe ish-kryeparlamentari Kadri Veseli.
“Urdhri ka qenë nga maja e shtetit. Fatkeqësisht nga presidenti i vendit dhe kryekuvendari. Që edhe në mjete të informimit e kanë pranuar që është vrasje, rasti i Astrit Deharit. Ata kanë dhënë urdhër të drejtpërdrejtë veglave të tyre të Gjykatë, Prokurori, AKI, e Polici për me inskenu tërë rastin”, ka shtuar Kurteshi.
Kurteshi ka theksuar se po bëhet “zvarritje e qëllimshme e rastit” të Dehari, i cili vdiq në Qendrën e Paraburgimit në Prizren, në nëntor të 2016-tës.
Teksa ka bërë edhe një kronologji të rastit, Kurteshi ka kërkuar përgjegjësi dhe drejtësi për Astrit Deharin.