Presidentja e Kosovës, Vjosa Osmani, ka pritur në takim zyrtar dhe me nderime shtetërore, presidentin e Malit të Zi, Milo Gjukanoviq.
Presidenti malazez do të vazhdojë pritjen nga presidentja e Kosovës, me ceremoni shtetërore, e cila ka filluar në ora 10:00.
Ndërkaq, pas takimit të dy presidentët do të mbajnë edhe një konferencë të përbashkët për media.
Kjo do të jetë vizita e dytë e Gjukanoviqit në Prishtinë, po ashtu, kjo vizitë zyrtare në Kosovë është bërë me ftesë të presidentes, Vjosa Osmani.
Gjithashtu, i pari i shtetit të Malit të Zi, Gjukanoviq, do të takohet edhe me kryetarin e Kuvendit Glauk Konjufca, si dhe me kryetarin e Prishtinës, Përparim Rama, i cili me këtë rast do të ndajë “Çelësin e qytetit”.
Po ashtu, Policia e Kosovës do të bëjë ndërprerje të përkohshme të qarkullimit të trafikut për shkak të vizitës zyrtare të Presidentit të Malit të Zi, Milo Gjukanoviq së bashku me delegacionin shoqërues të presidencës.
Këtë lajm e ka bërë të ditur Policia e Kosovës, duke deklaruar se me datën 18 dhe 19 të muajit maj në Kosovë, do të qëndrojë për vizitë zyrtare Presidenti i Republikës së Malit të Zi, Milo Gjukanoviq, i cili do të jetë i shoqëruar me delegacionin e presidencës.
Ofrimi i sigurisë si dhe mirëmbajtja e rendit do të jenë parësore për policinë e Kosovës. Kjo siguri do të jetë gjatë kohës së lëvizjes së eskortës dhe qëndrimit të delegacionit shtetëror.
Gjukanoviq vizitë në Kosovë, Policia kërkon mirëmbajtje të qetësisë publike