Vendimin e shtetit të Indisë për t’ia ndaluar boksieres nga Kosova të garojë në Kampionatit Botëror, presidentja e Kosovës, Vjosa Osmani, e ka cilësuar si “shkelje flagrante e standardeve sportive ndërkombëtare”.
Në një reagim në Twitter, ajo ka thënë se Kosova është anëtare e organizatës IBA Boxing, dhe se ka të drejtë të marrë pjesë në gara me flamurin dhe himnin e saj.
Ajo i ka bërë thirrje shtetit të Indisë ta rishqyrtojë vendimin e saj.
“Vendimi për të penguar Donjeta Sadikun për të marrë pjesë në Kampionatin Botëror të Boksit është shkelje flagrante e standardeve sportive ndërkombëtare. Si anëtare e IBA Boxing, Kosova ka të drejtë të marrë pjesë nën flamurin dhe himnin e saj. Ne i bëjmë thirrje Indisë të rishqyrtojë vendimin e saj”, ka thënë presidentja Osmani.
Medalistja e bronztë e botës dhe Evropës, Donjeta Sadiku, nuk do të marrë pjesë në Kampionatin Botëror të Boksit në New Delhi të Indisë.
Organizatori i Kampionatit bëri me dije se pjesëmarrja e boksieres Sadiku mund të bëhet vetëm me dy kushtet e vëna: Flamuri i Kosovës dhe himni shtetëror nuk do të përdoren në ndonjërën nga ceremonitë gjatë kampionatit botëror, si dhe pjesëmarrësit e Kosovës nuk do të lejohen të bartin flamurin e tyre, qoftë edhe në veshjet e tyre në formë të printuar.