Çdo hap i tyre regjistrohet nga kamerat e sigurisë.
Por, kur vjen puna tek siguria fizike, në ambientet e gjimnazit “Ahmet Gashi” në Prishtinë, është vetëm një person që mban përgjegjësinë.
Ky institucion për mbikëqyrjen e 1200 nxënësve, ka të angazhuar vetëm një punonjës në cilësinë e sigurimit fizik, madje, rroga e tij paguhet nga vetë prindërit.
Kjo sepse Komuna e Prishtinës nuk ka arritur që të sigurojë punonjës të tillë nëpër institucione arsimore në rreth 95 për qind të shkollave.
“Sigurimi fizik fillon në shtator dhe përfundon në qershor, natyrisht pagesën e tyre e bëjnë nxënësit, prindërit. Nuk është mirë, por megjithatë është e vetmja zgjidhje aktualisht, besoj që në të ardhmen komuna e Prishtinës ka siguru diçka të tillë”, ka thënë Haxhi Metaj, drejtor i shkollës “Ahmet Gashi”.
Për ta shmangur këtë situatë, në buxhetin e vitit 2026 të kryeqytetit janë ndarë 240 mijë euro për angazhimin e 50 oficerëve të sigurisë në shkolla.
“Me këtë projekt synojmë që të vendosim, të angazhojmë dhe të trajnojmë oficerë të sigurisë në shkolla, që do të jenë të përgatitur dhe certifikuar që të kenë një qasje gjithpërfshirëse, jo vetëm të sigurisë fizike por edhe emocionale të fëmijëve, dhe do të luajnë një rol të rëndësishëm edhe në mes oficerëve të sigurisë dhe policisë së Kosovës”, ka thënë Lulzim Fushtica, drejtor për Siguri dhe Emergjenca, Prishtinë.
Sipas Fushticës, trajnimi i atyre që përzgjidhen për këtë rol, do të kryhet në Akademinë për Siguri Publike në Vushtrri.
“Plani është që të kryhet pasi të aprovohet kurrikula, do të kryhet trajnimi në akademi për siguri publike në Vushtrri, dhe më pas do të certifikohen në bazë të kurrikulës dhe do të jenë të vendosur në shkollat e kryeqytetit në bazë të vlerësimit të rrezikshmërisë”, ka thënë Lulzim Fushtica, drejtor për Siguri dhe Emergjenca, Prishtinë.
Një mekanizëm i tillë për sigurinë në shkolla është i domosdoshëm sipas njohësit për çështje në Arsim, Rinor Qehaja.
Ky projekt sipas Drejtorisë për Siguri dhe Emergjenca, pritet të fillojë nga muaji maj i këtij viti.