Është konfirmuar data e takimit të mbetur nga java e 26-të në Superligën e Kosovës në basketboll ndërmjet Bashkimit dhe Sigal Prishtinës.
Kjo ndeshje do të luhet me datë 30 mars nga ora 20:00 në palestrën “13 Qershori” në Therandë, aty ku skuadra prizrenase i zhvillon ndeshjet si vendas tash e disa kohë.
Sfida u shtyrë për shkak të angazhimeve që kishin kryeqytetasit në ligën ENBL, ku është dashur të udhëtojnë në Poloni për ta zhvilluar ndeshjen kthyese të çerekfinales së play off-it ndaj ekipit polak, King Szczecin.
Bardhëekaltrit momentalisht gjenden në pozitën e dytë të tabelës dhe me këtë fitore do ta rikthenin kreun e tabelës e njëkohësisht ta siguronin vendin e parë një javë pa përfunduar sezona e rregullt në basketbollin kosovar.
Kujtojmë se dy vendet e para kualifikohen direkt për në gjysmëfinalet e play off-it.
Ndërkohë, Bashkimi ka siguruar pozitën e pestë dhe garat e play off-it do t’i nisë nga çerekfinalja.
Sa i përket sfidave të luajtura në këtë sezon mes këtyre dy ekipeve, kryeqytetasit kanë bilanc fantastik ndaj portokallezinjëve ku triumfuan në tre përballjet që janë luajtur.