Profesori i Bujqësisë, Imer Rusinovci, duke folur për cilësinë e grurit në Kosovë, ka thënë se shpeshherë Kosova importon grurë që nuk i plotëson standardet.
Në emisionin “Rreth e Rrotull”, Rusinovci ka thënë se sa i përket çështjes së cilësisë, Kosova qëndron shumë larg.
“Çka më brengos është që kontrolla e cilësisë për grurin duhet të jetë e standardizuar dhe shpeshherë Kosova kontrakton sasi të mëdha të grurit që nuk plotëson standardet. Shpeshherë kemi kontraktu rezerva të vjetra të vendeve tjera, që nuk e kanë plotësu hektolitrin. Ata e kanë obligim ta lirojnë rezervën e ta tregtojnë. Për çështjen e cilësisë jemi shumë larg”, ka thënë ai.
Ai ka thënë se Kosovës i nevojitet një strategji konkrete, që do ta rriste, jo vetëm sasinë e grurit, por edhe cilësinë e tij.
Sa i përket çështjes së çmimit të miellit apo bukëve, ai ka thënë se kjo nuk varet nga Kosova, por nga çmimet e bursave ndërkombëtare.