Prokuroria Themelore e Mitrovicës ka kërkuar paraburgim për katër zyrtarët policorë, të cilët dyshohen se janë të përfshirë në incidentin në veri të vendit, ku mbeti i plagosur një qytetar i nacionalitetit serb.
Në një përgjigje për Dukagjinin, zëdhënësi i Prokurorisë, Valon Preteni, ka thënë se një nga policët dyshohet për veprën “vrasje në tentavivë” dhe “manipulim apo fshehje e provave”.
Kurse, tre të tjerët, sipas tij, dyshohet se nuk e kanë bërë lajmërimin e veprës penale në organet kompetente.
“Prokuroria themelore e Mitrovicës ka dorezuar kërkesën për paraburgim për katër policët e dyshuar si të përfshirë në plagosjen e qytetarit serb tek “Ura e Bistricës”. Për të dyshuarin K.P i dyshuar për veprën penale Vrasje në tentative, manipulim dhe fshehje e provave. Ndërsa tre të tjerët F.M S.U dhe M.M, dyshohet se kanë kryer veprat penale moslajmërim të veprës penale”, thuhet në përgjigjen e tij.
Më 11 prill, Policia e Kosovës njoftoi se ka suspenduar katër zyrtarë policorë që dyshohet se janë përfshirë në këtë rast, përfshirë edhe njërin që dyshohet se mund të ketë shtënë me armë zjarri.
Ministri i Punëve të Brendshme të Kosovës, Xhelal Sveçla, ka deklaruar se sipas hetimeve të para, serbit që u plagos, policët i kishin dhënë sinjalin që të ndalonte, por ai me veturën e tij kishte vazhduar në drejtim të Zveçanit.
Fillimisht, Policia e Kosovës kishte mohuar përfshirjen në këtë rast.