Ish-presidenti amerikan Bill Clinton dhe ish-sekretarja e Shtetit Hillary Clinton kanë dëshmuar para Komitetit për Mbikëqyrje të Dhomës së Përfaqësuesve lidhur me çështjen e financierit të ndjerë Jeffrey Epstein, ndërsa pamje nga dëshmitë e tyre janë bërë publike.
Bill Clinton: Nuk kam qenë dëshmitar i krimeve të Epstein
Në fjalën e tij hyrëse, Bill Clinton mohoi të ketë pasur dijeni për ndonjë veprimtari të paligjshme të Epstein.
Ai tha se ka qenë vetëm një “njohje e shkurtër” me të dhe se marrëdhënia e tyre kishte përfunduar vite para se krimet e Epstein të dilnin në dritë.
“Shpresoj që përfshirja ime në këtë proces të ndihmojë që diçka e tillë të mos ndodhë më kurrë”, deklaroi ai, duke shtuar se ndien keqardhje për viktimat.
Gjatë dëshmisë, Clinton u pyet edhe nëse presidenti amerikan Donald Trump duhet të detyrohet të dëshmojë para komitetit.
“Kjo është për ju që ta vendosni. Por ai e njihte mirë”, u përgjigj Clinton.
Ai rrëfeu se rreth viteve 2002-2003 kishte pasur një bisedë me Trump në një aktivitet fondmbledhës në fushën e golfit të këtij të fundit.
Sipas tij, Trump i kishte thënë se kishte qenë mik me Epstein, por se marrëdhënia e tyre ishte prishur për shkak të një marrëveshjeje pronësore.
“[Trump] kurrë nuk më tha asgjë që të më bënte të mendoja se ishte i përfshirë në ndonjë veprim të papërshtatshëm në lidhje me Epstein”, theksoi Clinton, duke shtuar se biseda nuk kishte asnjë nënkuptim seksual.
Fotoja në vaskë – Clinton: Nuk e dija që ishte bërë
Rreth mesit të dëshmisë, Clinton u pyet për një fotografi të publikuar nga Departamenti amerikan i Drejtësisë, ku ai shfaqet në një vaskë me ujë të nxehtë.
Ai deklaroi se “pothuajse është i sigurt” që fotografia ishte realizuar në Brunei, në fund të një udhëtimi të gjatë në Azi, gjatë kohës kur ishte president. Sipas tij, Sulltani i Bruneit e kishte ftuar të qëndronte në një hotel të caktuar dhe i kishte sugjeruar të përdorte pishinën.
“Qëndrova pesë minuta në vaskë dhe pastaj shkova në dhomë për të fjetur”, tha ai, duke shtuar se nuk e kishte ditur që fotografia ishte realizuar.
I pyetur për një person tjetër në foto, identiteti i të cilit është redaktuar, Clinton u përgjigj dy herë: “Nuk e di kush është.” Ai theksoi se në zonë kishte edhe persona të tjerë nga delegacioni i tij dhe se nuk kishte asnjë fëmijë të pranishëm. Po ashtu, mohoi kategorikisht që të ketë pasur ndonjë aktivitet seksual atë natë.
Hillary Clinton refuzon të komentojë mbi fotot
Në dëshminë e saj, Hillary Clinton u pyet nga kongresistja republikane Nancy Mace nëse ishte shqetësuar kur kishte parë fotografi të bashkëshortit të saj në dosjet e Epstein, përfshirë atë në vaskë.
Clinton u përgjigj se nuk ishte aty për të dhënë opinione apo për të spekuluar dhe refuzoi t’i përgjigjej kësaj linje pyetjesh, pavarësisht insistimit të Mace.
Rreth një orë pas nisjes së dëshmisë së Hillary Clinton, një nga avokatët e saj njoftoi se një fotografi nga brenda sallës së dëshmisë ishte publikuar në media, pavarësisht se seanca zhvillohej me dyer të mbyllura, raporton BBC.
Avokati kërkoi sqarime se si ishte e mundur kjo, duke theksuar se ekipi i Clinton kishte kërkuar që në fillim një seancë publike, por kjo ishte refuzuar.
“I kam dhënë fund kësaj. Nëse po e bëni këtë, unë jam mbaruar. Mund të më mbani në përbuzje sa të doni. Kjo është sjellje tipike”, deklaroi Hillary Clinton e zemëruar.
Një ligjvënëse pranoi se kishte shpërndarë një fotografi nga salla, por tha se kjo kishte ndodhur para fillimit zyrtar të seancës. Clinton reagoi duke goditur tavolinën dhe duke theksuar se të gjithë duhet t’u përmbahen të njëjtave rregulla.
Pas kësaj, ajo u ngrit nga vendi dhe deklaroi, “Unë mbarova”, ndërsa seanca kaloi jashtë procesverbalit zyrtar.
Gjatë dëshmisë së tij, Bill Clinton konfirmoi se kishte shkruar një shënim për librin e ditëlindjes së 50-të të Jeffrey Epstein.
Ky libër me letra për këtë rast është bërë tashmë publik dhe përmban një shënim të kontestuar që duket se është nga Donald Trump.
Shtëpia e Bardhë mohon se Trump e ka shkruar shënimin ose ka vizatuar figurën e një gruaje që e shoqëron atë.
Clinton tha në dëshmi se shënimi mban dorëshkrimin dhe nënshkrimin e tij, por nuk mund të kujtojë se kush e kishte kërkuar që ta shkruante atë.