SHBA e kishte paralajmëruar Moskën se militantët e ISIS ishin të vendosur për sulm në Rusi, disa ditë para se të ndodhte sulmi në qytetin Crocus, një sulm që vrau dhjetëra njerëz, por presidenti i Rusisë, Vladimir Putin e hodhi poshtë këshillën duke e quajtur si “provokuese”.
Persona të armatosur sulmuan sallën e koncerteve pranë Moskës të premten, duke hapur zjarr dhe duke hedhur një mjet ndezës në sulmin më të keq terrorist në kryeqytetin rus në dekada.
ISIS ka marrë përgjegjësinë për sulmin, raportoi CNN.
Ekspertët thanë se shkalla e masakrës – disa prej të cilave u kapën në pamjet të siguruara nga CNN që tregonin turma njerëzish të strukur pas ndenjëseve me jastëk ndërsa të shtënat e armëve jehonin në sallën e madhe – do të ishte thellësisht e turpshme për udhëheqësin rus, i cili kishte dhënë një mesazh të sigurisë kombëtare vetëm një javë para se të fitonte zgjedhjet.
Jo vetëm që shërbimet e inteligjencës ruse dështuan në parandalimin e sulmit, thanë ata, por Putini nuk kishte dëgjuar paralajmërimet nga Shtetet e Bashkuara se ekstremistët po komplotonin për të sulmuar Moskën.
Në fillim të këtij muaji, ambasada e SHBA-së në Rusi kishte thënë se “po monitoronte raportet se ekstremistët kanë plane të afërta për të synuar tubime të mëdha në Moskë”, duke përfshirë koncerte dhe paralajmëroi qytetarët amerikanë që të shmangin vende të tilla.
Zëdhënësja e Këshillit të Sigurisë Kombëtare të SHBA-së, Adrienne Watson tha se qeveria amerikane “e kishte ndarë këtë informacion me autoritetet ruse në përputhje me politikën e saj të gjatë për të paralajmëruar”.
Por në një fjalim të martën, Putin i kishte kritikuar paralajmërimet amerikane si “provokative”, duke thënë se “këto veprime i ngjajnë shantazhit të plotë dhe synimit për të frikësuar dhe destabilizuar shoqërinë tonë”.
Ky qëndrim erdhi pavarësisht se autoritetet ruse kishin raportuar disa incidente të lidhura me ISIS-in gjatë muajit të kaluar.