Deputeti i PDK-së, Rashit Qalaj, ka deklaruar se bllokada institucionale në Kuvendin e Kosovës mund të marrë fund, nëse partia që ka fituar më së shumti ulëse propozon një kandidat tjetër për kryetar të Kuvendit – një emër që do të ishte i pranueshëm për spektrin e gjerë politik.
“Problemi i Kuvendit mund të zgjidhet në atë moment kur partia që ka fituar më së shumti ulëse të propozojë dikë tjetër, që është i pranueshëm për partitë e tjera”, ka thënë Qalaj, pak para nisjes së vazhdimit të 34-të të seancës konstituive.
Ai shtoi se PDK-ja ka ofruar propozimet e saj dhe po luan një rol konstruktiv për të shmangur, siç tha, një rrezik të madh – zgjedhjen e një kandidati që nuk garanton unitet.
“PDK është duke bërë një punë mjaft të mirë, meqenëse është duke evituar një të keqe të madhe – që një kandidat i papranueshëm dhe që nuk paraqet unitet të bëhet kryetar i Parlamentit”, u shpreh deputeti i PDK-së.