Qeveria e Kosovës ka miratuar në mbledhjen e sotme projektligjin për Shtetësinë e Kosovës, një nismë që synon të sjellë lehtësime të konsiderueshme për qytetarët e diasporës në rikthimin e shtetësisë.
Projektligji u prezantua nga ministri i Punëve të Brendshme, Xhelal Sveçla, i cili theksoi se kjo iniciativë përfaqëson një hap të rëndësishëm drejt harmonizimit të legjislacionit të Kosovës me praktikat më të mira ndërkombëtare.
“Në esencë, kjo nismë është një iniciativë strategjike e Qeverisë për të afruar legjislacionin tonë me praktikat më të mira ndërkombëtare. Përmes këtij projektligji realizojmë premtimin e qeverisë për lehtësimin maksimal të procesit të rikthimit të shtetësisë për diasporën tonë, të cilëve për shkak të kufizimeve në shtetet e tyre, iu është dashur të heqin dorë nga shtetësia e Kosovës”, tha Sveçla.
Projektligji është miratuar pa asnjë kundërshtim në mbledhjen e Qeverisë.