Shefja e Grupit Parlamentar të LVV-së, Mimoza Kusari, ka deklaruar gjatë ditës se nuk do të procesohen pagat për punëtorët e sektorit publik, të cilët kanë qenë pjesë e grevës, duke thënë se kështu thotë ligji.
Por, pagat nuk janë ekzekutuar as për mësimdhënësit e komunave me shumicë serbe, të cilët nuk janë pjesë e Sindikatës së Arsimit, dhe rrjedhimisht nuk kanë qenë pjesë e grevës së fundit në sektorin e arsimit.
Këtë e ka konfirmuar për Portalin Dukagjini, nënkryetari i Komunës së Novobërdës, Bajrush Ymeri, i cili ka thënë se pagat nuk i kanë marrë as mësimdhënësit që ishin pjesë e grevës e as ata që nuk ishin.
“Jo, pagat nuk kanë dalë për asnjë mësimdhënës. Ka prej atyre që kanë qenë pjesë e grevës, por janë edhe mësimdhënësit e komunitetit serb, të cilët nuk kanë qenë pjesë e grevës së organizuar nga SBAShK-u”, ka thënë ai.
Diferencime sa i përket procesimit të pagave, ka pasur edhe në sektorët të tjerë. Shërbyesve civilë u ka dalë paga edhe pse ishin pjesë e grevës, kurse mësimdhënësve jo.
Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, është shprehur i indinjuar me këtë vendim të qeverisë, të cilin e ka quajtur diskriminues e hakmarrës.
“Fatkeqësisht ende nuk janë procesuar në sistemin arsimor, teksa e keqja shtohet se janë procesuar për shërbyesit civilë që ishin në grevë dhe kjo është një segregacion, nuk ka çfarë të dyshohet për tjetër, përveç ndonjë qëllim që vetëm qeveria e di”, ka thënë ai.
Tutje, Jasharaj ka paralajmëruar “situatë të acaruar”, nëse nuk procesohen pagat deri më 5 tetor të këtij viti.
“Uroj që deri në kufirin ligjor më 5 tetor, Qeveria të mos e bëjë edhe këtë goditje, por t’i procesojë pagat, përndryshe do të kemi situatë të acaruar. Edhe mediat e kanë parë se edhe kur u bë pezullimi i grevës, votat pro dhe kundër ishin kogja të përafërta. Nuk është e drejtë të shkelen ligjet dhe të shkelet humaniteti. Nëse bëhet kjo goditje atëherë s’kemi si të mos besojmë se Qeveria i do grevat dhe përplasjet”, ka thënë ai.
Afati ligjor për ekzekutimin e pagave për punëtorët e sektorit publik është më së largu data e pesë tetorit e këtij viti.