Drutë i ka blerë, edhe atë 80 euro metrin. E idenë nuk e ka se çka është platforma e-Kosova.
71 vjecari Hysen Ibishi, nuk po e kupton se si duhet të aplikojë për atë që ministrja e ekonomisë Artane Rizvanolli të enjten e prezantoi si masë për subvencionim të efiçiencës së energjisë për qytetarët.
“Nuk kam dëgju për këtë mënyrë, online a, jo nuk kam dëgju, ndoshta të rinjët e dijnë, po unë nuk mirrem”, ka thënë Ibishi.
Por, këto masa duket edhe të kenë ardhur me pak vonesë, pasi pjesë e madhe e qytetarëve tashmë kanë bërë zgjidhjen me tu ulur temperaturat.
“Peleti kam dëgju, 700 euro, ni ton, a është e vërtetë nuk e di, vitin e kaluar e kam marrë peletin 180 euro, krahasim i madh 600% më shtrenjt, a sivjet me dru, 10 metra kub i kom edhe disa nga viti i kaluar”, ka shtuar Ibishi.
Një llogari në platformën e- Kosova nuk e ka as Naser Rafuna. Derisa thotë se ndihma e qeverisë është e mirëseardhur shton se forma e përfitimit duhet të jetë më e lehtë.
“Nuk kam dëgju për këtë, duhet me u marrë me djem, me pa ata a kemi llogari, me u konsultu, duhet me qenë sa ma e thjeshtë forma që me u ndihmu popullata… po thonë ministresha po thotë duhet me izolu shtëpinë se ka me marrë dimri I vështirë kështu që duhet me u përgatit”, ka thënë Rafuna.
E për të aplikuar për këto masa, fillimisht duhet të jeni të regjistruar me numrin personal në e-Kosova.
Për të zgjedhur më pas opsionin shërbimet, grantet dhe subvencionimet, e deri tek opsioni për subvencionim të efiçiencës së energjisë.
Aty pastaj kërkohen të dhënat e sakta të vendbanimit, formës së ngrohjes e kështu me radhë.
Qeveria do të subvencionojë disa lloje të pajisjeve elektrike efiçiente për ngrohje, të cilat kursejnë deri në 70 për qind energji elektrike.