Dhjetë raste të dhunës në familje janë shënuar në 24 orët e fundit në Kosovë.
Sipas raportit të përditshëm të Policisë së Kosovës, një rast është raportuar në Gllogoc, Gjakovë, Podujevë, Vushtrri ndërkaq dy raste në Prishtinë, në Fushë-Kosovë dhe në Prizren.
Në komunën e Gllogocit një person është arrestuar pasi ka ushtruar dhunë ndaj bashkëshortes së tij, e cila ka pranuar tretman mjekësor.
“Është arrestuar i dyshuari mashkull kosovar, nën dyshimin se ka ushtruar dhunë ndaj bashkëshortes së tij viktimës femër kosovare. Viktima ka pranuar tretman mjekësor. Me vendim të prokurorit, i dyshuari është dërguar në mbajtje”, thuhet në raport.
Ndërkaq, në Prishtinë, një grua ka raportuar se është sulmuar fizikisht nga bashkëshorti i saj, i cili pastaj është arrestuar.
“Ankuesja femër kosovare raporton se i dyshuari mashkull kosovar (bashkëshorti i saj) e ka sulmuar fizikisht dhe ka ushtruar dhunë psikike ndaj saj. Nuk raportohet për lëndime trupore. I dyshuari është arrestuar dhe pas intervistimit me vendim të prokurorit është dërguar në mbajtje. Rasti nën hetime”, thuhet në raport.
Ndërsa, në Fushë-Kosovë, raportohet për dy raste të dhunës në familje.
Sipas raportit 24-orësh, një person është arrestuar, pasi e kishte sulmuar një femër duke i shkaktuar lëndime trupore.
“Viktimës i është ofruar tretman mjekësor, në konsultim me prokurorin, pas intervistimit i dyshuari është dërguar në mbajtje”, thuhet më tutje në raport.
Po ashtu, edhe rasti tjetër është i ngjashëm.
“Është arrestuar i dyshuari mashkull kosovar nën dyshimin se pas një mosmarrëveshje ka sulmuar fizikisht bashkëshorten e tij, viktimën femër kosovare. Viktimës i është ofruar trajtim mjekësor, ndërsa i dyshuari me vendim të prokurorit pas intervistimit është dërguar në mbajtje”.
Në Podujevë, një femër është sulmuar nga bashkëshorti i saj, i cili pastaj është arrestuar dhe dërguar në mbajtje.
“Viktima femër kosovare ka pranuar tretman mjekësor pasi e njëjta dyshohet se është sulmuar fizikisht nga bashkëshorti i saj i dyshuari mashkull kosovar. Palët janë intervistuar dhe me vendim të prokurorit, i dyshuari është arrestuar dhe dërguar në mbajtje”.
Në komunën e Prishtinës, një femër ka raportuar se pas një mosmarrëveshjeje, vjehrri i saj ka shkaktuar dhunë ndaj saj.
“Palët janë intervistuar dhe me vendim të prokurorit, viktima me dy fëmijët e saj është dërguar në strehimore, ndërsa i dyshuari është liruar, rasti në procedurë të rregullt”, thuhet në raport.
Në Gjakovë, një femër është sulmuar fizikisht nga bashkëshorti i saj.
“Viktima femër kosovare ka raportuar se bashkëshorti i saj i dyshuari mashkull kosovar ka ushtruar dhunë fizike ndaj saj. I dyshuari gjendet në arrati, rasti në procedurë hetimore”, thuhet në raport.
Në Vushtrri, një femër ka raportuar se bashkëshorti i saj po ushtron dhunë fizike dhe psikike në vazhdimësi ndaj saj.
“Më 09.08.2022 ankuesja femër kosovare ka raportuar se bashkëshorti i saj i dyshuari mashkull kosovar, në vazhdimësi është duke shkaktuar dhunë fizike dhe psikike ndaj saj. I dyshuari gjendet në arrati, rasti në procedurë hetimore”, thuhet në raport.
Po ashtu, edhe në Komunën e Prizrenit janë raportuar dy raste të dhunës në familje.
Rasti i parë ka të bëjë me një person që ka ushtruar dhunë ndaj bashkëshortes së tij, ku pastaj i dyshuari është dërguar në mbajtje.
“Viktima ka pranuar tretman mjekësor. Me vendim të prokurorit, i dyshuari është dërguar në mbajtje”.
Ndërsa, rasti i dytë ka të bëjë me një femër që ka raportuar se bashkëshorti i saj në vazhdimësi ka ushtruar dhunë ndaj saj dhe e ka dëbuar edhe nga shtëpia.
Sipas raportit 24-orësh, palët janë intervistuar dhe me vendim të prokurorit rasti vazhdon në procedurë të rregullt.