Pesë raste të dhunës në familje janë shënuar në 24 orët e fundit në Kosovë.
Sipas raportit të përditshëm të Policisë së Kosovës, dy raste janë raportuar në Gjakovë, ndërkaq nga një në Fushë Kosovë, Ferizaj dhe Prizren.
Për rastet e ndodhura njëri nga personat e dyshuar është liruar pas intervistimit, të tjerët janë dërguar në mbajtje.
Ndërsa, njëri nga personat që dyshohet se ka keqtrajtuar një viktimë femër kosovare është duke u kërkuar nga Policia e Kosovës.
Bëhet fjalë për rastin e ndodhur në Komunën e Gjakovës, që një i dyshuar mashkull kosovar ka keqtrajtuar fizikisht një viktimë femër kosovare, e cila ka marrë tretman mjekësor. Por, që rasti po hetohet dhe policia janë në kërkim te të dyshuarit.
“Gjakovë 03.11.2022 – 18:20. Viktima femër kosovare ka raportuar se është keqtrajtuar fizikisht nga i dyshuari mashkull kosovar. Viktima ka marrë tretman mjekësor dhe është dërguar në shtëpi të sigurtë. I dyshuari gjendet në kërkim policor. Rasti është duke u hetuar”, thuhet në raportin e Policisë.
Në komunën e Prizrenit, një e dyshuar femër kosovare ka ushtruar dhunë ndaj viktimës mashkull kosovar, që e njëjta është dërguar në mbajtje me vendim të prokurorit.
“Prizren 03.11.2022 – 16:00. Është arrestuar e dyshuara femër kosovare e cila ka ushtruar dhunë ndaj viktimës mashkull kosovar. Viktima ka pësuar lëndime trupore dhe është dërguar për tretman mjekësor. Me vendim të prokurorit e dyshuara është dërguar në mbajtje”, bëhet e ditur në raportin e Policisë.
Ndërkaq rasti i raportuar në Fushë Kosovë, ka ndodhur të enjten që një mashkull kosovar dyshohet se ka ushtruar dhunë ndaj një viktime femër kosovare, mirëpo më pas i dyshuari me vendim të prokurorit është liruar.
“Fushë Kosovë 03.11.2022 – 12:00. Është arrestuar i dyshuari mashkull kosovar, pasi ka ushtruar dhunë ndaj viktimës femër kosovare. Viktima ka pranuar tretman mjekësor, ndërsa me vendim të prokurorit pas intervistimit i dyshuari është liruar dhe rasti shkon në procedurë të rregullt”, thuhet në raport.
Njashtu në Ferizaj, një person ka ushtruar dhunë ndaj një femre, e cila ka pranuar tretman mjekësor, ndërsa me vendim të prokurorit i dyshuari është dërguar në mbajtje.
“Ferizaj 03.11.2022 – 11:20. Është arrestuar i dyshuari mashkull kosovar pasi ka ushtruar dhunë ndaj viktimës femër kosovare. Viktima ka pranuar tretman mjekësor dhe me vendim të prokurorit i dyshuari është dërguar në mbajtje”, thuhet në raportin e Policisë.
Edhe një rast tjetër është raportuar të ketë ndodhur në komunën e Gjakovës, që një mashkull kosovar është arrestuar dhe është dërguar në mbajtje pasi ka ushtruar dhunë ndaj një femre të enjten.
“Gjakovë 03.11.2022 – 11:00. Është arrestuar i dyshuari mashkull kosovar, pasi që ka ushtruar dhunë ndaj viktimës femër kosovare. Me vendim të prokurorit i dyshuari është dërguar në mbajtje”, bën të ditur raporti i Policisë së Kosovës.
Raporti 24-orësh i Policisë së Kosovës, njashtu ka bërë të ditur se janë raportuar gjatë të mërkurës dhe të enjtes dy raste të ngacmimeve seksuale.
Njëri prej tyre ka qenë në komunën e Ferizajit, që është arrestuar një mashkull shtetas i Afganistanit, pasi i njëjti ka ngacmuar seksualisht viktimën femër, shtetase të Afganistanit. Megjithatë, me vendim të prokurorit palët janë liruar.
“Ferizaj 02.11.2022 – 23:45. Është arrestuar i dyshuari mashkull shtetas i Afganistanit, pasi që ka ngacmuar seksualisht viktimën femër shtetase e Afganistanit. Me vendim të prokurorit pas intervistimit palët janë liruar dhe rasti shkon në procedurë të rregullt”, thuhet në raport.
Ndërsa, rasti tjetër i ngacmimit seksual i raportuar në 24 orët e fundit ka ndodhur njashtu në komunën e Ferizajit, që një femër është ngacmuar seksualisht nga një mashkull dhe rasti vazhdon të jetë nën hetime.
“ Ferizaj 03.11.2022 – 10:30. Viktima femër kosovare ka raportuar se është ngacmuar seksualisht nga i dyshuari mashkull kosovar. Lidhur me rastin i dyshuari është intervistuar, rasti nën hetime”, thuhet në raportin e PK-së.