Qeveria e Kosovës ka thënë se diskutimet në Këshillin e Sigurimit të OKB-së mes kryeministrit të Kosovës, Albin Kurti e presidentit të Serbisë, Aleksandër Vuçiq mund të jenë shkak për kërcënimet e pretenduara ndaj Kurtit.
Në një përgjigje për Dukagjinin, qeveria thotë se kryeministri nuk është ndjerë i kërcënuar dhe se gjithçka ka shkuar mirë gjatë qëndrimit të tij në Maqedoni të Veriut.
“Jemi të informuar se ka shumë kërcënime nga individë dhe struktura që kanë lidhje me Beogradin zyrtar. Nervoza në Beograd pas mbledhjes së Këshillit të Sigurimit të OKB-së i ka shtuar kërcënimet dhe agresivitetin ndaj Kryeministrit. Në Shkup janë parë forca të shumta të rendit. Kryeministri nuk është ndjerë i kërcënuar. Gjithçka ka shkuar mirë gjatë qëndrimit të tij në Maqedoni të Veriut. Ai tashmë është në Kosovë dhe po vazhdon agjendën e tij”, thuhet në përgjigjen e qeverisë.
Ndryshe, Ministria e Punëve të Brendshme e Maqedonisë së Veriut ka mohuar se ka pasur tentim atentati ndaj kryeministrit të Kosovës, Albin Kurti, sa ka qenë në vizitë në Shkup.
Ndërsa Kurti ka thënë të shtunën se ka parë forca të shumta policore në Shkup gjatë mbledhjes që pati me partitë socialiste. Ai ka theksuar se ka shumë kërcënime nga individë e struktura që rrënjët i kanë në Beograd.
Radiotelevizioni Publik i Kosovës fillimisht raportoi sipas burimeve se ka pasur tentim atentati kundër kryeministrit të Kosovës, Albin Kurti.