Pesëmbëdhjetë përfaqësues të sindikatave dhe organizatave të gazetarëve dhe botuesve nga gjashtë vende u mblodhën në Gjenevë për thirrjen për të liruar Julian Assange në emër të lirisë së shtypit.
Kjo thirrje, erdhi pasi qeveria britanike miratoi javën e kaluar ekstradimin e Assange për në Shtetet e Bashkuara të Amerikës.
Ai kërkohet të përballet me gjyqin për shkelje të Aktit të spiunazhit të SHBA-së duke publikuar dosje ushtarake dhe diplomatike në vitin 2010 dhe mund të përballet me deri në 175 vjet burg nëse shpallet fajtor.
Pierre Ruetschi, kreu i Klubit zviceran të Shtypit që priti ngjarjen, paralajmëroi se “demokracia po merret peng”, njofton VoA News.
“Kjo përpjekje për kriminalizimin e gazetarisë është një kërcënim serioz”, ka thënë Ruetschi.
Gjithashtu, edhe Tim Dawson nga Unioni Kombëtarë i Gazetarëve në Britani dhe Irlandë, vë në pikëpytje gjendjen e gatetarëve të tjerë, nëse Assange ndjeket penalisht si spiun.
“Nëse Julian Assange mund të kërcënohet me ndjekje penale si spiun, çfarë do të thotë kjo për gazetarët e tjerë?”, ka pyetur Dawson.
Assange është mbajtur në paraburgim në një burg të sigurisë së lartë në Londrën juglindore që nga viti 2019, për një rast të mëparshëm që e akuzonte atë për sulm seksual në Suedi.