Universiteti i Prishtinës “Hasan Prishtina” ka njoftuar se revista “Filologji” tashmë është pajisur me ISSN, në mënyrën online me numrin 3027-5113, ndërsa në print me numrin 3027-5105.
“Filologji” është revistë për studime filologjike, e themeluar në vitin 1996, e cila boton artikuj shkencorë origjinal dhe recensione mbi tema nga fusha e filologjisë në gjuhën shqipe dhe në gjuhën angleze.
“Marrë parasysh kompleksitetin multikulturor e multimedial të përdorimit të fjalës/tekstit në shek. XXI, revista inkurajon edhe botimin e artikujve që tejkalojnë kufijtë tradicionalë të studimit filologjik dhe trajtojnë tekstet në mënyrë ndërdisiplinare”, thuhet në njoftim.
Revista është e hapur për studime të strukturës së gjuhës, studime gjuhësore tipologjike, të kontakteve gjuhësore, studime letrare e të tjerë.
Revista aktualisht është e indeksuar në CEEOL dhe synon të indeksohet edhe në platforma të tjera.