Shtëpia e Arsim Lahut në Rimanishtë është vetëm njëra ndër mbi 100 shtëpitë në këtë fshat që nuk furnizohet me ujë nga ujësjellësi rajonal.
Kjo ngase në tërë fshatin mungon shtrirja e rrjetit të ujësjellësit duke detyruar banorët, të sigurojnë ujë vetë.
Ndonëse Lahu për disa nevoja po përdorë pusin, ai thotë se ka të tjerë në fshat që nuk e kanë as këtë mundësi.
E premtimet për shtrirjen e ujësjellësit kanë qenë të përhershme e secila zhgënjim në vete.
“Ne ja dalim me bunar, fatmirësisht në lagjen tonë ka ujë me bollëk por në këtë vit ka pas rënie dy metra po në shumicën e fshatit s’ka ujë hiç. Kur është koha si tash, ka thatësira, s’ka pas shira, ka mungesë të ujit. Kanë premtu edhe herën e fundit, me sa di unë ka premtu edhe 2022 Përparim Rama, po ka projekte të papërfundume”, ka deklaruar Arsim Lahu, banor i fshatit Rimanishtë.
Mes të tjerash, Lahu shpjegon rëndësinë e prezencës së rrjetit të ujësjellësit, gjersa thekson se edhe nga puset, nuk kanë ujë çdoherë.
“Uji do ishte i kontrolluar, ne furnizohemi me puse. Është diçka tjetër. Përgjithësi ka gëlqere shumë që realisht i dëmton mjetet, maqinat, krejt çka punojmë me ujë e për pije s’diskutohet. Paralajmëruan javën e kalume që s’kemi prej 9 deri 18:00, fatmirësisht s’ke ashtu se s’kishim pas rrymë s’kish pas as ujë. Kalon në jetë primitive”, ka deklaruar Lahu.
Televizioni ka pyetur kompaninë rajonale të ujësjellësit ‘Prishtina” e cila, përgjegjësinë ia hedh komunës.
“Investimet për atë fshat duhet bërë nga komuna e Prishtinës. Pas investimeve nga ta, ne e marrim nën menaxhim. Përgjegjësinë e shtrirjes së rrjetit të ri e ka komuna. Kur komuna t’i siguron fondet për projekte në infrastrukturë të ujit, pastaj bëhen projektet. Pa fonde nuk munden me u bo projektet”, ka theksuar Arjeta Mjeku, zëdhënëse në K.R.U “Prishtina”
Dukagjini ka pyetur edhe Drejtorin e Investimeve Kapitale, Sokol Havollin por i njëjti, ka kërkuar kohë deri të hënën për përgjigje.