Për herë të dytë brenda tri ditësh, trupi i Liridona Ademajt u varros, dhe këtë herë për të mos u lëvizur më.
Ademaj, e vrarë më 29 tetor, më 1 nëntor u varros në fshatin Cermjan, në vendlindjen e burrit, Naim Murselit.
Burri me të cilin kishte dy fëmijë dhe kaloi 13 vjet martesë, tani dyshohet se e organizoi vrasjen e saj, rrethanë që bëri që familja Ademaj, të kërkojë që trupi i vajzës së tyre të varroset në vendlindje.
Prokuroria Themelore e Prishtinës dha leje, e dhe arkivoli i saj u transportua deri në vendlindje.
Tashmë në varrezat e fshatit Rracaj, kishin mbërritur shumë pjesëmarrës që qëndruan në heshtje.
Familja e saj e ngushtë, nuk janë përmbajtur nga lotët e dhimbjes, duke marrë pjesë në një ceremoni të tillë për herë të dytë brenda pak ditësh.
Ashtu siç ndodhi këto ditë, barrën e ngushëllimit po e bartë vëllai Leonardi, ai po i jep gajret familjes.
Dikush që e kishte njohur qysh moti Liridona Ademajn, ishte Teuta Haxhiu, ish-deputetja që kishte qenë edhe mësuese e saj, dhe u drejtua të pranishmëve.
“Frikacak e i paburrë. Do të kërkojmë deri në fund drejtësi…”, ka thënë Teuta Haxhiu, ish-deputete.
Ish deputetja Haxhiu kërkoi që dora e drejtësisë të veprojë.
“Krah shoqeve e shokëve, sjellje shembullore…”, shtoi “Haxhiu.
Kurora lulesh e ngushëllime për familjen shprehën edhe përfaqësues tjerë, përfshirë deputetë e ministra.
Familja Ademaj ka hapur dyert, ndërsa të pamet do të mbahen për tri ditë.