Ministrja e Ekonomisë, Artane Rizvanolli, ka thënë se Kosova mbetet shteti me çmimin më të ulët të energjisë elektrike në rajon.
Në seancën e Kuvendit të Kosovës, ku po diskutohet për uljen e çmimeve të energjisë elektrike, Rizvanolli ka thënë se vitet e fundit ishin sfiduese për sektorin e energjisë, jo vetëm në Kosovë, por në tërë Evropën.
“Vitet e fundit kanë qenë sfiduese për sektorin e energjisë në Kosovë dhe në tërë Evropën. Patëm një bashkëpunim të shkëlqyeshëm me Shqipërinë. Me subvencionimin më të ulët dhe përkundër rritjes së tarifave, Kosova mbetet shteti me çmimin e energjisë elektrike më të lirin në rajon e Evropë”, tha ajo.
Në anën tjetër, ministrja e këtij dikasteri ka fajësuar partitë opozitare, për përkeqësim të situatës me energji elektrike në Kosovë.
“Me largimin e bllok-tarifës, 80 për qind e familjeve kanë pasur rritje të faturave të energjisë elektrike, ndërsa pjesa tjetër që kanë shpenzuar më shumë energji elektrike, vetëm ata kanë pasur ulje”, shtoi ajo.
Sipas saj, heqja e bllokut tarifor e ka sjellë situatën deri tek eksplodimi i kërkesës për energji elektrike në masa jonormale.
“Një gjë e tillë edhe pa nxitje të efiçiencës së energjisë na ka bërë përballjen me krizën shumë më të vështirë sesa që ka qenë e nevojshme ta kemi”, tha më tutje ministrja.
Rizvanolli ka treguar se Qeveria e Kosovës i ka ndihmuar qytetarët dhe bizneset përmes subvencionimit.