Ambasadori i Gjermanisë në Kosovë, Jorn Rohde, ka thënë se është absurde që të rrezikohet përshkallëzimi i situatës për shkak të çështjes së targave.
Rohde ka theksuar se ka më shumë nevojë për burrështetas, teksa reagoi për postimin e ambasadorit amerikan në Kosovë, Jeff Hovenier, i cili propozoi shtyrjen e zbatimit të vendimit për gjobitjen e targave ilegale për 48 orë.
“Mirë që kemi më tepër kohë për të punuar me palët e interesuar për gjetjen e zgjidhjes. E përsëris, është absurde të rrezikohet përshkallëzimi për targat”, ka shkruar Rohde në Twitter.
“Kemi nevojë më shumë për burrështetas, më pak politikë të rrezikshme”.
Good to have more time for EUSR @MiroslavLajcak to work with stakeholders on a solution. I repeat: It is absurd to risk escalation over licence plates. We need more statesmanship, less brinkmanship. https://t.co/QPMXmiRgqr
— Ambassador Jörn Rohde (@GermanAmbKOS) November 22, 2022
Kryeministri i Kosovës, Albin Kurti, ka shtyrë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS – Republika e Kosovës.
Ambasadori amerikan në Kosovë, Jeffrey Hovenier, ka thënë se Shtetet e Bashkuara i kanë kërkuar Qeverisë së Kosovës shtyrje 48-orëshe të vendimit për shqiptimin e gjobave, për t’i lejuar zyrtarët evropianë dhe ata amerikanë që të angazhohen me Kosovën dhe Serbinë për të gjetur zgjidhje për këtë çështje.
Si përgjigje ndaj kërkesës së ambasadorit amerikan, Kurti ka thënë se është i gatshëm të punojë me SHBA-në dhe BE-në për të gjetur zgjidhje në dy ditët e ardhshme.
Takimin urgjent, që ka rezultuar pa marrëveshje, e ka organizuar kryediplomati evropian, Josep Borrell.